Langt síðan síðast...

Jæja, nú hef ég loksins tíma og er í nógu góðu skapi til að blogga :)

Ætla að renna yfir hvernig síðasta vikan hefur verið.... Þessi færsla verður líklega frekar löng, sé ekki alveg hvernig hjá því verður komist. Skil vel ef enginn nennir að lesa hana til enda! :D

Ég vaknaði snemma á föstudagsmorguninn og eftir morgunmat í flýti hélt ég af stað niðrá Nörrebrogade að sækja lyklana að nýja kollegíuherberginu mínu. Þar sem ég var nývöknuð og hausinn ekki alveg kominn í gang þá gleymdi ég því á miðri leið að ég væri á leið niðrá Nörrebrogade þar sem umsjónarmaðurinn er með skrifstofu og fannst ég vera að fara beint á kollegíuna :) Ég fór því út úr strætó á vitlausum stað og var búin að labba að götunni sem kollegían er við þegar ég fattaði að ég væri á leið á vitlausan stað :) Ég þurfti því að taka auka strætó til að leiðrétta mistökin... Eftir að sækja lyklana fór ég beint uppí skóla til þess að missa ekki af síðasta fyrirlestri blokkarinnar þar sem fólk ætlaði að klæðast eins og Axel Hunding eins og ég var búin að segja ykkur frá :) Sumir tóku þetta meira alvarlega en aðrir og voru í allri A.H. múnderingunni... það var frekar kostulegt að sjá :) Fyrsta korterið af fyrirlestrinum fór í fliss, bæði hjá nemendum og kennara. Í lok fyrirlestrarins var honum svo færður rauður pólóbolur með e-i áletrun sem ég sá reyndar ekki hver var.

Eftir þetta hélt ég gangandi að nýju kollegíunni minni (komin með nóg af strætóferðum eftir þessar 5 um morguninn). Ég verð að játa að við fyrstu sýn af kollegínunni og herberginu fékk ég algjört áfall. Mér leist ekkert á þetta! :S Ég fór út í sjokki og labbaði bara í e-a átt... endaði á e-u strætóstoppi og tók bara næsta strætó sem kom... komst að því eftir nokkur stopp að ég var á leið í bandvitlausa átt.... fór þá úr strætónum og tók næsta sem lá í hina áttina... uppá Nörreport.. og þaðan annan strætó "heim". 8 strætóar og klukkan ekki orðin 2... ojoj.

Um kvöldið var svo menningarnótt í Kaupmannahöfn. Það voru alveg hundruðir viðburða af öllu tagi í gangi. Ég hins vegar fór ekki á neina af þeim atburðum sem voru yfir daginn og kvöldið (fyrir utan eitt, minnist á það á eftir) þar sem ég var upptekin af öðru. Mamma og pabbi voru nefnilega að koma til Kaupmannahafnar þetta kvöld til þess að hjálpa mér að flytja og kaupa húsgögn (sætt af þeim ekki satt?). Ég hitti þau á Hovedbanegård um kl. 10. Skrapp reyndar aðeins fyrst niður á Rådhuspladsen með Gúnda og Einari þar sem við horfðum á litla krakka fara í bjórkassaklifur. Þar sem þau s.s. fá einn bjórkassa, klifra upp á hann, fá svo annan... og eiga s.s. að reyna að komast eins hátt upp og þau geta og mega s.s. bara standa upp á kössunum, ekki snerta jörðina (held ég). Á staðnum var svo svona krani sem krakkinn var hengdur í svo hann myndi ekki slasa sig. Við horfðum á litla stelpu, ca. 9-10 ára kannski, klifra svona upp... marga metra... (ég er ekki góð í að meta hæðir... en hún var næstum komin upp að toppi kranans allavega og það voru nánast engir kassar eftir þegar kassastaflinn hennar fór að riða til og féll). Hún var þvílíkt köld sko, alveg ligeglad á svipinn, tuggði bara sitt tyggjó og virtist þykja þetta jafn mikið mál og að glápa á sjónvarpið. Það var ekki fyrr en staflinn hennar var farinn að sveigjast ískyggilega til að hún greyp í öryggislínuna.
Við röltum síðan aðeins niður Strikið, mauluðum brenndar möndlur og fórum í dótabúð. Síðan hélt ég uppá lestarstöð að hitta foreldra mína og aðstoða þau með farangurinn þeirra (ekkert smá magn) upp á hótel. Síðan hófst leit að veitingastað sem væri opinn á þessum tíma. Enduðum á Vesuvio á Ráðhústorginu, það var ágætt.
Ég var síðan samferða Gúnda og Einari tilbaka uppí Lyngby aftur... Ég ætlaði nú bara beint að sofa þar sem ég vissi að laugardagurinn yrði langur og erfiður... Það varð hins vegar ekki mikið úr því, ég hafði gleymt að það var TDC kvöld á kollegíuganginum (Tour de Chambres). Það er s.s. bara... mesta fyllerí annarinnar skilst mér. Ég hef allavega aldrei séð ganginn jafn subbulegan og fólkið.. sjaldan.. jafn drukkið :)
Gerði þau mistök að kíkja fram í eldhús... sá mjög fljótlega eftir því.... Fólkið þarna sem flest hefur lítið sem ekkert talað við mig þennnan tvo og hálfa mánuð sem ég hef dvalið þarna.. verður alveg voða ræðið þegar það er svona drukkið. Og sumir.... ansi uppáþrengjandi og óþolandi.... Sem betur fer tókst Gúnda að hjálpa mér að flýja þaðan eftir e-n tíma... það var samt ekkert sérlega auðvelt... (hefði örugglega verið skárra ef það hefðu verið aðrar stelpur þarna sem þeir gætu böggast í en svo var ekki, sú eina sem ég sá þarna lét sig hverfa fljótlega). Reyndi að fara að sofa en gat það ekki fyrir háværri tónlist... sofnaði ekki fyrr en um 3...

Vaknaði snemma á laugardeginum því við þurftum að nýta tímann vel, mikið af húsgögnum og drasli að kaupa :) Það var hins vegar hellings vesen með að fá líkið okkar... eða bílinn s.s. sem við leigðum af bílaleigunni Lej et lig. Það tafði okkur um nokkra tíma :S
Það var forgangsatriði að finna svefnsófa (fyrir mömmu og pabba til að hafa í íbúðinni minni) og rúm (fyrir mig) svo við gætum sofið í nýja herberginu um nóttina. Ég gæti alveg farið út í nákvæmar lýsingar á helginni.. alveg þónokkuð sem er vert að minnast á... en ég ætla að hlífa ykkur við því og gefa ykkur hér samanþjappaða útgáfu:
- Við komumst af því að gatnaskipulag í Lyngby er 30x verra en í Kópavogi.
- Ég keypti mikið af húsgögnum.
- Ég keypti mikið af drasli.
- Við eyddum miklum tíma í að skrúfa saman húsgögn.
- Við borðuðum hádegismat í IKEA þrjá daga í röð.
- Við fengum lítinn svefn og soldið leið á húsgögnum sem þarf að skrúfa saman.
- Mér fór mikið fram sem kortalesara og leiðsögumanni.
- Mér fór smám saman að lítast betur og betur á herbergið mitt.
- Fólk horfir mikið á mann ef maður keyrir um á stórum ógeðslega ljótum sendiferðabíl sem er málaður svartur og á stendur "Lej et lig".
- ILVA er æðisleg húsgagnaverslun með frábæra þjónustu.
- Það er mjög góður pizzastaður hérna í hverfinu.
- Ef maður er mjög óheppinn fylgir alltaf heppni í kjölfarið.
- Mamma og pabbi eru húsgagna-skrúfi-saman-meistarar.

Mamma fór svo heim á mánudagsmorguninn en pabbi ekki fyrr en á þriðjudagskvöldið því á þriðjudaginn þurfti að sækja kassana mína niðrá höfn. Það gekk fínt...

Síðan þau fóru er ég bara búin að vera að ganga frá, taka til, reyna að læra og svoleiðis fjör :)

Í gær fór ég í fyrsta sinn út í búð hér í hverfinu... komst þá að tvennu... Í fyrsta lagi eru mjög svo sætar götur hér í kring (og gatan mín er ferlega krúttleg) og í öðru lagi er stutt í allt :) Hér við hliðiná er kirkja sem gluggarnir mínir snúa útað. Næsta hús við hana er svo síðasta hefðbundna baðhús Kaupmannahafnar :) Við hliðiná því er svo grunnskóli.. hinum megin við götuna er svo leikskóli...
Niðrá horni er þvottahús... og þar við hliðinaá er bakarí. Næsta gata við er svo Nörrebrogade. Sú gata er FULL af Kebab-stöðum og Persneskum veitingastöðum... og svona litlum araba-búðum :) Og þar er plötubúð!!!! Ef maður labbar aðeins eftir þeirri götu kemur maður niður á Nörrebros Rundell en þar eru 3 matvöruverslanir, 7-11 búð, apótek, McDonalds (OJJBARA), Sunset, gæludýrabúð... name it. Pósthús í sjónmáli nokkrum metrum ofar við götuna...

Birgði mig meðal annars upp af kryddi, átti bara salt og pipar fyrir :D Hver kryddstaukur kostaði tæpar 40 isk. Smá munur á verðum hér og heima...

Dagurinn í dag var ágætur... vaknaði kl. hálf 9, dreif mig í sturtu, sturtaði í mig skál af kornflexi og dreif mig niður í þvottahús (tvær ferðir í að flytja þvottin niðrí kjallara, jeij). Svo önnur ferð til að setja draslið í skilvindu og í þurrkarann og enn önnur að sækja þetta.... jeij . Tók líka helling til og svona... voða lítið merkilegt... Seinni part dags fékk ég svo skemmtilega heimsókn, minn fyrsti gestur hér á nýja heimilið mitt (fyrir utan mömmu og pabba sem teljast nú varla með). Gesturinn var s.s. strákur sem er með mér í námi, hann ætlaði rétt að kíkja en það endaði með að hann fór ekki fyrr en um hálf 11 leitið eftir að við höfum fengið okkur að borða á veitingastað hérna útá horni. Voða nice.

En þarna.. ég er alveg að farast úr þreytu... ætla að hætta þessu rugli. Þessi færsla er pottþétt hræðilega skrifuð, full af stafsetningavillum og so on... en í þetta sinn.. verðið þið bara að sætta ykkur við það. Ég er í engu ástandi til að leiðrétta þetta núna! *Geisp-geisp-geispedí geisp*

Eitt sem ég vil bæta við: Takk til mömmu og pabba fyrir að vera svona yndisleg að koma út og vesenast þetta með mér (og fyrir hnífapörin) :D Takk til ömmu og afa fyrir samlokugrillið (og sæta viskustyttið), hinna ömmu og afa fyrir hraðsuðuketilinn, takk til Nonna frænda fyrir pönnurnar, og so on... úff.. ég er of þreytt til að hugsa. núna.. En allavega, takk :) Þetta hjálpar allt við að gera heimilislegra hér... :)