Discovering Homework and hating SAS

Faye: I'm sorry Dora, but liking Homework more than Discovery is like enjoying vanilla more than chocolate ice cream. It means you are boring. / Dora: Whatever. You indie kids can take your pop bias and stick it somewhere cramped and smelly. Homework is Daft Punk's best album, hands down.
-Questionable Content; September 21, 2005 12:19am

Núna loksins, 9 mánuðum eftir að hafa lesið þetta comic strip, veit ég hvorri þeirra ég er sammála. Pantaði Homework á þriðjudaginn og hún kom í póstinum í dag. Eins og ég ELSKA Discovery (keypti hana í lok mars) þá finnst mér Homework bara hreint út sagt frekar leiðinleg! Allavega svona við fyrstu hlustun. Hverjir eru sammála? Er þvílíkt vonsvikin :S

Hins vegar er það nú ekki ástæðan fyrir því að ég er að blogga. Ástæðan er sú að ég ákvað í gærkvöldi að fljúga út til Lúxemborgar á sunnudagsmorguninn (18.júní) í stað þess að fara næsta föstudag (23.júní). Ástæðan fyrir því er sú að þann 23.júní er þjóðhátíðardagur Lúxemborgar. Þeir halda samt upp á það daginn áður! Af því tilefni eru allir í vinnunni hjá pabba og fjölskyldur þeirra boðnir í e-ð VIP partý og ég tými bara ekki að missa af því :P Bæði bara afþvíbara og líka því þá fæ ég tækifæra til að hitta fólkið sem pabbi er að vinna með og svona (hlaðborð, opinn bar og besta útsýni ever fyrir flugeldasýninguna voru líka atriði sem heilluðu!).
Ég vildi helst bara breyta fluginu og fljúga 20., 21. eða 22. en þegar ég hringdi og reyndi að breyta miðanum var mér sagt að þetta væri óbreytanlegur miði! Ekki hægt að breyta þótt maður borgaði á milli ef hinn miðinn er dýrari plús borga breytingargjald eins og hjá öðrum flugfélögum.. heldur bara.. ekki hægt. Helvítis plebbar. Daginn eftir ákvað ég að reyna að fara og tala við þá og gerði mér því sér ferð út á Kastrup (eina skrifstofan þeirra hér). Það gerði nákvæmlega ekkert gagn. Blablablalba... eina leiðin að kaupa annan miða. Engin önnur flugfélög sem fljúga þangað nema LuxAir sem eru okrarar. Allir miðarnir hjá SAS í næstu viku voru þá orðnir geðveikt dýrir.. en ég sá fyrir tilviljun að miðarnir á sunnudeginum voru ekki svo dýrir svo að ég skellti mér bara á það. Þetta var s.s. um kl. 19 í gærkvöldi... en.. þar sem ég var að panta miðann svona fáum dögum fyrir brottför.. þá varð ég að sækja miðann.... og það varð að gerast... í gær! Kl. orðin 19... þannig ég þurfti þá að fara AFTUR upp á helvítis Kastrup.. bara til að sækja miðann. Það tók tvo tíma og ég var svona frekar pirruð. Afhverju mátti ég ekki bara sækja miðann daginn eftir? Eða bara áður en ég var að fara í flugið? Fávitar.
Fattaði svo þegar ég var búin að panta miðann að það voru þá skrilljón hlutir sem ég þyrfti að redda.. á tveimur dögum! Plús ég þyrfti nauðsynlega að undirrita mikilvæga pappíra útaf íbúðinni áður en ég færi úr landi og frekar hæpið væri að redda því fyrr en í næstu viku :S Stress, stress og meira stress!

Gærdagurinn var hreint og beint ömurlegur s.s. En dagurinn í dag... ekkert nema góðar fréttir!! Í fyrsta lagi gengur bara frekar vel að hakka á "to do" -listann. Í öðru lagi, komu mikilvægu pappírarnir í póstinum í dag þannig ég gat undirritað þá strax og sent tilbaka! Í þriðja og síðasta lagi... fékk ég email um að umsókn mín um að mega kaupa íbúð í Danmörku... var samþykkt!!! Sem var síðasta hindrunin í vegi okkar fyrir að geta keypt íbúð hér (þær hafa verið nokkuð margar!).... e-ð sem við erum búin að vera að vinna í síðan í mars! Þvílíkur léttir! Víj :D

Þannig jáh.. ég er að fara frá Danmörku, kem aftur eftir mánuð, flyt þá í nýtt húsnæði... nóg að gera! :D

Ekki mikið annað í fréttum... pabbi kom hérna á þriðjudaginn, það var voða gaman þótt það hafi verið ferlega mikið að gera hjá okkur. Fórum samt á írskan pöbb um kvöldið og horfðum á fótboltann ;) Daginn eftir fór ég svo að hitta ömmu, afa, frænda minn, konu frænda míns og frændsystkini mín þrjú... þau stoppuðu við hér í Kaupmannahöfn í nokkrar klst á leið sinni til Póllands. Það var rosa gaman líka :) Bara búin að vera ágætis vika.. svona þegar á heildina er litið!

Yfir og út!

Sun is shining, the weather is sweet

Góða veðrið er komið aftur! Spurning hvað það stoppar lengi í þetta skiptið...
Vissuð þið að hér í Kaupmannahöfn er fullt af fólki sem fer í sólböð í kirkjugörðunum? Það er kirkjugarður hér rétt hjá og þegar síðasta góðviðristímabil var fór ég þangað að taka myndir. Þetta var í fyrsta skipti sem ég kom inn í garðinn og þið getið ímyndað ykkur hvað ég var hissa þegar ég sá hálfnakið fólk útum allt í sólbaði milli grafanna!! Hins vegar ákvað ég bara að prófa að fylgja þessu skondna fordæmi og get ég sagt ykkur að þetta venst ansi fljótt! :P Yndislegur garður.. (ég hef alltaf verið frekar hrifin af kirkjugörðum, bara ekki í myrkri).
Reyndar var ég að lesa á skilti þarna í gær og komst að því að svæðið þar sem ég hreiðra venjulega um mig (eins og margir aðrir) er víst svæði þar sem þeir biðja mann að vera ekki því þar eru nýju grafirnar... en þetta er besti bletturinn! Þannig á meðan aðrir halda áfram að vera þarna þá held ég að ég sé ekkert að flytja mig... *skammast sín smá*.

En jáh, ekki eyða tíma ykkar í að sjá The Omen, það er lítið varið í hana. Frekar slöpp svona... ef þið hins vegar farið á hana þá hafið augun opin fyrir nafninu mínu :P
X-men 3 er hins vegar vel þess virði að sjá í bíó. Betri en ég bjóst við :)

Fór á klassíska tónleika um daginn í tónleikasalnum í tívolí. Sá Carmina Burana með vini mínum en þetta var s.s. afmælisgjöfin mín frá honum. Þetta var voða fínt þó svo "sumir" hafi ekki alveg verið að pæla þegar þeir keyptu miðana og því sátum við FREMST og þá meina ég hnén á okkur voru í 10 cm fjarlægð frá sviðinu og allt sem ég sá ef ég horfði beint fram voru fætur. Ég HATA að sitja fremst (erft frá pabba)... En jáh, vel flutt verk þó svo að þeir sem sáu um óperu-partana hafi verið misjafnlega góðir (kvenröddin var hrikalega flott!!). Hah, og litli kórinn var ÚBER SÆTUR! Drengjakór með meðalaldur ca. 7 ár, algjörar dúllur :) Líka frekar skondið að sjá þá syngja á móti stóra kórnum sem samanstóð mestmegnis af ömmum og öfum.
Kíkti reyndar í tívolí aftur tveim dögum seinna með vinkonu minni (erum báðar með árskort). Fengum okkar svona spænskar vöflustangir með ís (mmm) og horfðum á H.C. Andersen brúðusýninguna, mega notalegt bara.

Hmmm hmm.. annars var ég frekar vonsvikin þegar það var tilkynnt um daginn að The Subways myndu ekki getað spilað á Rock a Field... áður var búið að tilkynna að Juliette & the Licks hefðu þurft að hætta við. Önnur bönd voru reyndar sett inn í staðinn... en ég vildi sjá The Subways! :(
Komst líka að því að þó að ég komi út á þjóðhátíðardegi Lúxemborgar þá halda þeir upp á það daginn áður en nota daginn sjálfan í þynnku og leti. Þannig ég missi af því, urr!

Annars er lítið að frétta... skemmdi hvítu buxurnar mínar um daginn.. sem ég er búin að eiga í 6 ár! Datt og það kom gaaaaat :S (Ég er snillingur!) Fór í partí síðasta laugardag sem var ekkert sérstakt... uhm.. hvað fleira?... Jáh, pabbi kemur á morgunn! :) Verður einn dag hér, þurfum að fara að hitta lögfræðing og bankakall og skrifa undir fullt af pappírum.

Jæja, blah.. held ég hafi ekki meira að segja... nema jú, búin að bæta við fullt af linkum hér á síðuna nýlega. Örfáir nýjir bloggarar, t.d. Sölvi (þið verðið að finna sjálf út hverjir hinir eru). Setti svo inn fleiri af mínum uppáhaldslinkum; myndasögur og teiknimyndir og alls konar dót ef ykkur leiðist. Salóme to the rescue sko!

Sumar!

Jiiiiii, það er kominn júní! Tíminn líður svo hratt! Finnst árið 2006 bara hafa flogið hjá hingað til... nánast :) Bráðum hálfnað! :o

Ég held þetta sumar eigi eftir að vera svo geeeeðveikt! :D *hlakka til, hlakka til, hlakka til*
23.júní --> haldið til Lúxemborgar, sama dag er þjóðhátíðardagur þar og því örugglega mikið fjör.
25.júní --> Rock A Field - Placebo, The Subways, Franz Ferdinand o.fl.
7.-10.júlí? --> Skreppa til Berlínar - skoða, chilla, etc (ath. úrslitaleikurinn í HM er í Berlín 9. þannig það verður geðveikt stemming í borginni).
10.júlí --> Ziggy Marley tónleikar í Lúx
12.júlí --> Sigur Rós á útitónleikum í Lúx
13/14.júlí --> Keyra til Jótlands
15.júlí --> Brúðkaup hjá Boggu frænku
--->Keyrt til Köben
16./17./18. júlí --> Flytja í nýju íbúðina?!?! :o
Byrjun ágúst --> Kíkja til Spánar?

En jáh.. Næstu vikur fara bara í chill og oh.. pakka niður í kassa? :S Reyndar tónleikar á þriðjudaginn... og jáh, svo eru nú einhverjir búnir að hóta að koma kannski í heimsókn í júní, veit nú ekki hvort e-r láti verða af því?

P.S. Ég útnefni hér með Sölva sem krútt mánaðarins! Takk aftur fyrir hjálpina Sölvi, þú ert æði ;)

I'm a cuckoo

Veðrið virðist lítið vera að skána. Það birtir upp inn á milli en svo koma þessi leiðinda ský með rigningunni sem þeim fylgja. Sumarið kom og fór, ég vona að það rati tilbaka á endanum!

En á meðan veðrið er svona þá er bara um að gera að halda sig inni og hafa það notalegt í staðinn. Í dag kom vinkona mín í heimsókn. Við fórum út á kebabstaðinn á horninu og keyptum okkur hlussustórar pizza-samlokur og lime kók. Komumst að því að lime kók er ekki gott og að þessi kebab staður er betri í flestu öðru en pizza-samlokugerð. Við átum nú samt á okkur gat og lögðumst svo yfir kvikmyndagláp. Hlógum alveg vel mikið yfir Poltergeist :D Tvær myndir í röð en svo hélt hún heim um ellefuleitið þar sem hún þurfti að ná strætó (hver nennir að hjóla í rigningu?).

En jáh.. svo ég bakki nú aðeins.. um ca. viku! Þegar ég skrifaði síðustu færslu hélt ég að yðar einlæg væri að verða veik og hafði áhyggjur af því að missa af Belle & Sebastian tónleikum. Þær áhyggjur voru óþarfar sem betur fer :D Þrátt fyrir mega stress bæði á fimmtudeginum og föstudeginum vegna fasteignamála leið mér bara vel. Fór og hitti Guðný og Þóru niðrá Vesterport (þær komu til DK sérstaklega til að sjá tónleikana). Þaðan héldum við og fengum okkur að borða og síðan var rölt niður á Vega.
Tónleikarnir voru alveg mega góðir, hvað get ég annað sagt?!?! :D Belle & Sebastian eru náttúrulega yfirgengilega skemmtileg og yndisleg hljómsveit þannig ekki var við öðru að búast! Suburban kids with biblical names hituðu upp, tóku örfá lög og voru alveg ágæt bara. B&S tóku svo alveg mega gott sett og spiluðu bæði gamalt og nýtt... Mitt uppáhald var þegar þau spiluðu I'm a cuckoo :D Bliss! Alsæla! Um leið og þau byrjuðu að spila þetta lag hættu fæturnir mínir að hlýða og fóru að hoppa og skoppa. Brosið gerði sitt besta til að þröngva sér alla leið til eyrnanna og sælutilfinningin var algjör. "Tónlistarleg fullnæging" -svo ég vitni nú í sjálfa mig, ekki er hægt að lýsa þessu öðruvísi, hehe ;)
Við stóðum næstum alveg fremst og vorum því í svona 3 metra fjarlægð frá hljómsveitinni allan tímann. Er yfirleitt ekki mikið fyrir að troða mér svona framarlega en þetta var frábært :D Þó það hefði ekki verið nema til að sjá Bobby í návígi... gæti þessi maður verið e-ð fallegri? ;D Hehe.
En jáh.. eftir tónleikana.. fórum við í hliðarsal og fengum okkur að drekka... ætluðum svo bara að yfirgefa svæðið en þegar við vorum að labba í gegnum tónleikasalinn komum við auga á Stuart M, söngvara og forsprakka Belle & Sebastian. Að sjálfsögðu fórum við til hans og spjölluðum við hann ;) Spurðum hann m.a. hvort það væri satt sem sagt væri að þau ætluðu ef til vill að halda til Íslands í sumar..... og.. viljið þið vita svarið?? :D
"It's a definite possibility" -sagt með yndislegum skoskum hreim ;) (Ef þau fara til Íslands verða líklega tvennir tónleikar).

Jáh jáh... síðan héldum við á Stengade 30. Bar/skemmtistaður sem hefur m.a. þá kosti að þaðan er örfárra mínútna labb heim til mín og aldurstakmarkið er aðeins 18 ár (þar sem sumir eru ekki orðnir 20 ;) ). Annar kostur er að hann er á tveimur hæðum þannig ef manni líkar ekki tónlistin/stemmingin á annarri þá færir maður sig bara á hina :) Staðurinn er reyndar frekar subbulegur og klósettin ógeð en það er allavega áhugavert fólk. Kvöldið var fínt en við héldum heim um þrjúleitið. Ég komst að því að strákar geta verið alveg óendanlega þrjóskir... Ekki myndi ég halda áfram að spurja sömu manneskju aftur og aftur hvort hún vildi dansa ef í hún segir í 75% tilvika nei :P (Ekki það að viðkomandi hafi hlustað á þessi nei, en hvað um það).

Guðný morgunhani vakti okkur Þóru kl. 10... úff úff... en það var allt í lagi.. ég hélt bara áfram að sofa þegar þær voru farnar og tók því rólega yfir daginn. Um kvöldið komu þær, báðar með fangið fullt af pizzum og bjór! Yesss! Svona eiga laugardagskvöld að vera! ;D Seinna um kvöldið gekk til liðs við okkur vinur Guðnýjar að nafni Viktor og síðan um kl. 23 héldum við öll fjögur niðrá Stereo Bar.
Ágætis staður en við vorum ekki alveg að fíla tónlistina og skortinn á sætum strákum (held reyndar að Viktori hafi verið slétt sama um það síðarnefnda) en um ehhhh... eitt eða tvö leitið... ákváðum við að rölta niðrá Stengade 30 frekar.. auðvitað með viðkomu í 7eleven fyrir pulsukaup!
Byrjuðum á efri hæðinni þar sem við höfðum haldið okkur fyrra kvöldið. Guðný og Þóra voru hins vegar ekkert alltof sáttar við tónlistina sem DJ-inn, Miss cockrock, hafði í hávegum, þannig við héldum á þá neðri. Þar var alveg mega góð tónlist í gangi... svo góð... að við dönsuðum þar til kl. 5... en þá var staðnum lokað! :o
Ég komst aftur í kast við þrjóska stráka... en þessi lét sér ekki nægja að biðja mig um að dansa við sig aftur og aftur og aftur ... og spyrja hvert við ætluðum næst þegar staðurinn lokaði kl. 5.. .. neih.. heldur elti hann okkur líka!! Tókum ekki eftir því fyrr en við komum aftur að 7eleven, þá reyndi hann e-ð að tala við mig en ég var búin að fá nóg og flúði bara inn í búðina en þá lét hann sig hverfa.

Þetta var þó ekki síðasta ævintýri kvöldsins því í 7eleven lentum við á e-ð tæpum starfsmanni sem sakaði tvö úr hópnum um stuld!! Þrátt fyrir að honum væri sýnt mjög greinilega fram á að svo væri (AUÐVITAÐ!) ekki þá átti hann e-ð erfitt með að játa að hann hefði haft rangt fyrir sér og var með þvílíkan dónaskap! Sagði okkur að PISS OFF og var svo að segja að við helvítis íslendingarnir ættum bara að drullast aftur til Íslands og halda okkur þar og ég veit ekki hvað og hvað. Óskemmtileg reynsla það :(
En jáh... við stúlkurnar fórum að sofa um kl. 6:15 og ég held það sé óhætt að segja að okkur hafi ekki verið ætlað að sofa. Við vorum vaktar við 3 kirkjuklukkna session, 2 símtölum, 2 sms-óhljóðum, símavekjaraklukku... er ég að gleyma e-u? Þessi helgi var samt kannski full mikið af því góða fyrir mig! Var alveg illt í lærunum í 3 daga á eftir vegna þess að ég dansaði allt of mikið :S Já ég, anti-dans manneskjan mikla... úffsí púffs, allt getur gerst.
Kl. 16 á sunnudeginum fór ég niður í bæ að hitta Önnu Guðrúnu sem var stödd hér í DK í tilefni af fermingu frænda hennar. Fórum og fengum okkur að borða á kaffihúsi og var það voða huggulegt :)

Annars er alveg allt að gerast í fasteignamálum... síðustu dagar hafa alveg farið í íbúðarskoðun, fundi, ákvarðanatökur, símtöl, stress og emailsendingar. Woohoo :) Meira um það seinna þegar allt er komið á hreint.

Þessi færsla átti að koma upp í gærkvöldi en tafðist um hálfan sólarhring, úbbosí :)

Rokk og rigning / Rock & Rain

Jæja! Eftir næstum því tvær vikur af geðveiku veðri, aka. hita, sól og sælu.... kom ekki jafn geðveikt veður. Þvílíka rigningin í dag! Ojbara! (Búið að vera heldur leiðinlegt frá síðasta laugardegi en ekki svona slæmt!) Ég þurfti að mæta á fund í dag... og á leiðinni rigndi eins og hellt væri úr fötu :( Sem þýddi að þrátt fyrir fínu regnhlífina mína þá urðu gallabuxurnar mínar gjörsamlega blautar í gegn... og það voru ekki margir þurrir þræðir í restinni... Þannig ég sat s.s. gegnblaut... á fundi í rúma klst... og svo tók það næstum því klst að komast heim því einn strætó bilaði og blokkaði leiðina fyrir öllum hinum... þannig mér var ískalt í næstum þrjár klst... og líður núna eins og ég sé að verða veik :( Vona að það sé bara vitleysa því á morgun er ég að fara á; *TaTa* BELLE & SEBASTIAN tónleika!!!!!! Omgsí. Týpískt að ég verði svo bara hundlasin og geti ekki farið. Ugh.. vona ekki :/

Annars er svo sem ekki mikið í fréttum... Húsið í Víðihvamminum verður afhent 15.júní og þá flytja mamma og Gísli til Lúxemborgar. Benedikta er nú þegar flutt í íbúðina sem hún mun leigja í gamla góða Kópavogi.. og jáh. Hmm hmm... Ég held til Lúxemborgar þann 23.júní til að hitta fjölskylduna og fara á tónleika :)
- 25. júní er það Rock-A-Field þar sem meðal annars Placebo og Franz Ferdinand spila
- 10. júlí er það svo Ziggy Marley
..og
- 12. júlí útitónleikar með Sigur Rós

*hlakk hlakk*

Síðan verður líklega haldið í brúðkaup frænku minnar á Jótlandi... þannig jáh.. sumarið mitt er allt að skýrast svona smám saman :)

Húsnæðisbrask er ennþá í fullum gangi.. voðalega flókið allt saman.. nenni ennþá ekkert að skrifa um það fyrr en það er allt komið á hreint.

Dúddúrú..

Jáh.. held ég láti þetta duga í bili.. ætla að fara að sofa!

*snúll* til þín frá Danaveld!

EDIT:
P.S. Omgsa deisí! Hvernig gat ég gleymt...! Á einum af ljósmyndaflippdögunum mínum hérna á meðan góða veðrið var fór ég í Botanisk Have og eyddi þar e-m 2 klst í að rölta, taka myndir og lesa "Dýrðlegt fjöldasjálfsmorð". Allavega, ein myndin var tekin sérstaklega fyrir einn af vinum mínum. Jubb jubb, Atli Már, þessi mynd er fyrir þig ;) (Híhí!)

The Flaming Lips

Hæj krúttin mín

Ég ætlaði að vera búin að blogga fyrir löngu síðan en síðustu vikurnar hafa bara verið crazy og ég hef einnig haft aðeins takmarkaðan aðgang að interneti (á meðan ég var á Íslandi). Það væri enginn vandi fyrir mig að skrifa heila bók um þessar 3 vikur sem eru síðan ég bloggaði síðast (þó síðasta færsla hafi verið póstuð 18. apríl var hún skrifuð 12.) en þar sem ég einfaldlega tými ekki tímanum í það þá ætla ég að stikkla á stóru.

Restin af Lúxemborgarferðinni var mjög fín. Við kíktum yfir til Þýskalands tvisvar sinnum (til borgarinnar Trier) og einu sinni yfir til Frakklands (til Metz). Ég varð tvítug og var haldið upp á það með því að fara á æðislegan og mjög nýstárlegan veitingastað í Lúx sem heitir Apoteca. Þar borðuðum við mjög svo áhugaverðan mat og drukkum vín sem var jafn gamalt mér :) Annars var afmælisdagurinn furðulegur að öðru leiti. Mamma og pabbi sátu föst (lasin) í umferðarteppu á leiðinni til/frá Belgíu mest allan daginn. Ég og Benedikta eyddum þó nokkrum klst niður í miðbæ Lúx að versla en ég fann ekkert til að kaupa mér :/ Um fimmleitið vorum við þó öll komin heim og vorum því öll heima þegar 3 lögregluþjónar bönkuðu upp á hjá okkur (þeir voru sko alls ekki kátir). Þannig já, áhugaverður dagur í meira lagi.

Þann 18. apríl héldum við systurnar til Íslands með margra klst stoppi í Köben sem við notuðum í að skreppa heim til mín og svo niður í bæ. Héldum snemma upp á flugvöll (já, þetta var ansi langt stopp) þar sem ég sóaði fullt af pening og svo ákváðum við að skella okkur á Hereford og sátum þar og átum á okkur gat þar til tími var kominn til að halda út í flugvél. Þegar til Keflavíkur var komið þurfti ég að keyra í bæinn, þess má geta að ég hef ekki keyrt í 9 mánuði og fannst frekar óþægilegt að þurfa að fara beint á Keflavíkurveginn.

Íslandsdvölin var í meira lagi ánægjuleg og einkenndist aðallega af partíum/veislum og kaffihúsahangsi :) 4 afmælispartí, 1 fermingarveisla og 1 fjölskylduafmælisboð. Missti svo af einni afmælisveislu (hjá afa) þar sem hún var á sama tíma og fermingin. Hey, og eitt míní partý. Allavega... tvö af þessum afmælispartíum voru mín eigin og ég var barasta mjög ánægð með hvernig þau heppnuðust :D Eina sem ég get kvartað yfir er að fólk í því seinna var ekki nógu duglegt að drekka og að ég steingleymdi að taka myndir fyrr en seint í veislunni og missti því af að ná myndum af mörgum sem voru þá þegar farnir. Tvítugsafmælið hans Jóa var skemmtilegt og ég held ég hafi sjaldan skemmt mér jafn vel og í 21-árs partýinu hans Geira!

Ég fékk margt sniðugt og skemmtilegt í afmælisgjöf :) Æðislega digital myndavél (sem ég valdi sjálf í Þýskalandi) frá mömmu og pabba. Ótrúlegt magn súkkulaðis, m.a. 1 kg stykki af Cadburry súkkulaði frá Ingeri og Ástu en þær gáfu mér líka bók með spakmælum og wiskey smokka! (Var ætlast til þess að þetta væri allt notað saman stelpur? :D Ef svo, þá gæti útkoman orðið nokkuð áhugaverð...). Ég fékk svo fullt fullt af áhugaverðum bókum, frumsamda sögu, geisladiska, SingStar Rocks! (nú verð ég að kaupa mér PS2!!), DVD, sjúkrakassa, súrar gúrkur og ýmislegt fleira skemmtilegt. Vil minnast sérstaklega á bókina sem Guðný gaf mér en sú bók inniheldur einungis ljósmyndir af garðálfum!

Ég kom heim til Danmerkur á mánudagskvöldinu og hafa síðustu dagar verið ÆÐISLEGIR! :D Þriðjudagurinn fór nú bara í að afpakka og letihaugast (ég er alltaf svo þreytt eftir flug) en kvöldið var skemmtilegt. Á miðvikudeginum var svo ekkert smá gott veður og eyddi ég seinnipartinum í félagsskap Lalla frænda, Ingu og krakkanna. Röltum um Strikið (fram og til baka), fórum á kaffihús, í dótabúð og heilsuðum upp á Silvíu Nótt!! Það var alveg yndislegt! Síðan hélt ég á The Flaming Lips tónleika sem voru haldnir í tónleikasalnum í Tívolí. Þeir voru hreint út sagt ótrúlegir. "Magical" svo ég vitni nú í snillinginn Wayne Coyne!
Frábær tónlist (Yoshimi!!) og mergjað show! Risastórar appelsínugular blöðrur fylltu salinn um leið og þeir byrjuðu að spila auk þess sem niður rigndi milljónum marglitra pappírssnifsa. Unaðslegir tónar bárust úr öllum áttum á meðan fram á sviðið hlupu hinar ýmsu ofurhetur auk hóps geimvera og jólasveina! Þetta hefði ekki getað verið betra! Það ættu allir að hlusta á þann boðskap sem þessi hljómsveit hefur fram að færa. M.a: -að það sé kominn tími til að við hættum að trúa á e-n æðri guð og förum að trúa á hvort annað, -séum betri við hvort annað, -áttum okkur á að lífið sé stutt og maður eigi ekki að sóa því í rugl, etc.
Tónleikarnir enduðu svo á alveg svakalegan hátt! Wayne (sem spjallaði mikið við áhorfendur gegnum alla tónleikana) beindi orðum sínum að Bush.... og síðan hófu þeir að spila War Pigs eftir Black Sabbath!!!!!!!!! Omg hvað það var FLOTT! Got weak in the knees ... Á bakvið var svo sýnt myndband frá voðaverkum hans (þið vitið hvað átt er við hér) og af Bush sjálfum og öðrum "góðum" mönnum.

Í dag vaknaði ég snemma og var komin í Tívolí kl. 11:30 og hitti þar Lalla & co. Áttum þar yndislegan dag saman í ótrúlega yndislegu veðri (ég var allt of vel klædd fyrir þetta veður). Sókskin og amk 19°C... mmmmmm :D Vorum þarna til 19:00 en þá þurftu þau að halda út á flugvöll en ég hélt heim, þreytt og sæl :)

Tvennt að lokum. Í fyrsta lagi, kíkið á myndasíðuna mína! Síðan ég fékk myndavél hef ég verið dugleg við að taka myndir og reyni eftir besta megni að henda þeim inn á netið. Þar eru myndir frá afmælispartíunum mínum (merkt BG og Mitt ammli), afmælinu hans Jóa, afmælinu hans Geira (BG-2), gærdeginum (Strikið, Silvía Nótt, THE FLAMING LIPS - merkt 3mai2006) og svo frá Tívolí ferðinni í dag (Tivoli 040506).
Í öðru lagi: Rosalega margir sögðu mér, þegar ég var á Íslandi, að þeir væru að koma til Köben í sumar. Ég get ómögulega munað nákvæmlega hvenær hverjir eru að koma og vil ég því biðja þá vini, kunningja og fjölskyldumeðlimi sem verða e-ð í Köben í sumar að senda mér email og láta mig vita með dagsetningar og svona. Langar alveg rosalega að ná að hitta ykkur sem flest nefnilega. Ég þarf að fara að skipuleggja mitt sumar fljótlega, ákveða hvenær ég fer til Lúxemborgar og svo framvegis og því væri best að fá að vita svona sem fyrst svo ég geti allavega reynt að skipuleggja e-ð í kringum það hvenær fólk verður hér.

Kveð nú ykkur bumbulínur og bumbulinga í bili *knús*

Luxembourg

Ég hata blogger.com
Á miðvikudagskvöldinu síðasta skrifaði ég færsluna sem birtist hér að neðan. Hins vegar hef ég ekki getað sett hana inn fyrr en núna þrátt fyrir ítrekaðar tilraunir. Drasl síða. Er eiginlega kominn tími á að blogga aftur, margt búið að gerast en ég vil bara ekki setja inn tvær færslur í einu þannig hin kemur seinna. Annars má nefna að ég er orðin tvítug, takk fyrir afmæliskveðjurnar þið sem þær sendu :)

**********************************************

Í herberginu sem ég er í núna er ekkert nema tvær dýnur, sængur, koddar og svo þessi tölva. Það er ekki þægilegt að sitja bara á dýnu, með lyklaborðið á hnjánum og skrifa blogg, ég er gjörsamlega dofin í fótunum. Því mun þessi bloggfærlsla verða skrifuð í flýti...

Ég er s.s. stödd í húsinu sem mun verða heimili foreldra minna og bróður míns næsta árið og hugsanlega lengur. Þetta er voða huggulegt hús, það stendur við rólega, sæta götu og er með fallegan garð. Á þessari hæð (þeirri efstu fyrir utan háaloftið) eru 4 svefnherbergi og eitt stórt baðherbergi. Þau eru öll nánast tóm þar sem húsgögnin þeirra verða ekki flutt hingað fyrr en í sumar þegar mamma og Gísli flytja hingað. Ef gengið er niður hinn ofursnobblega marmarastiga sem liggur niður á næstu hæð þá er þar stórt hol/gangur, lítið baðherbergi, ágætlega stórt eldhús og stór stofa/borðstofa með arni. Þaðan er svo líka hægt að ganga út á verönd/garð. Í kjallaranum er svo enn eitt svefnherbergið, stórt þvottahús og stór bílskúr.

En jáh, ég ætla að renna smá yfir atburði helgarinnar og síðustu daga :) Þar sem ég verð í burtu frá Danaveldi í 3 vikur ákvað ég að reyna að hitta alla mína bestu vini þar fyrir brottför. Hef ekki séð svo mikið af þeim undanfarið þar sem þrjú þeirra eru molbio-fólk (molecular biomedicine) og eru búin að vera á fullu í próflestri (lokapróf í prótínefnafræði á föstudaginn síðasta) og breski vinur minn var erlendis.

Á föstudaginn fór ég s.s. að hitta þann breska og fullt af öðru fólki á e-m bar. Þegar ég kom þarna voru bara hann og danski vinur/meðleigjandi/meðeigandi (á fyrirtæki) hans komnir. Síðan kom sænsk vinkona bretans, æskuvinur danans, íslenskt par sem eru víst vinir sænsku stelpunnar og svo dönsk stelpa sem er framtíðar meðleigjandi bretans og danans :P S.s. jáh, bjórdrykkja og spjall á bar, bjórdrykkja og spjall heima hjá bretanum og dananum og svo bjórdrykkja og dans á öðrum bar/klúbb. Rölti heim e-r tímann rétt fyrir kl. 4.

Á laugardaginn fór ég svo með dönskum vini mínum á listasafn. Skoðuðum Highlights sýninguna (svona best of af því sem er búið að vera að gerast í myndlist síðustu 700 árin). Það var voða kózí og gaman. Síðan ætluðum við að fara út að borða en mér tókst að stíga í poll og var því ákveðið að kaupa frekar pizzu og taka með heim (til að komast sem fyrst í þurra sokka).
Sunnudagurinn fór að mestu í að taka til og pakka niður en um kvöldið kom annar vinur minn og varð úr hið besta hangs-/spjallkvöld.
Á hádegi á mánudeginum kom svo vinkona mín og dró mig niður í bæ. Eyddum 5 klst-um í ilmvatns-þefun, "versl", nachos-át, spjall og rölt. Hélt síðan heim og beið eftir mömmu og systkinum mínum. Við áttum skemmtilegt kvöld og svo snemma á þriðjudagsmorgninum héldum við til Lúxemborgar :)


Pabbi kom og sótti okkur á flugvöllinn og sýndi okkur nýja húsið en þurfti svo að fara aftur í vinnuna. Þar sem ekkert okkar svaf neitt sérlega vel þarna nóttina áður tókum við því bara rólega "heima" um daginn. Seinnipartinn fórum við svo í smá skoðunarferð og út að borða á mjög svo skemmtilegan stað. Góður matur og skemmtilegt umhverfi. Borðið okkar var holt að innan og í gegnum borðplötuna (gler) sá maður líkneski af geimveru (soldið ET-leg) sem var lýst upp með bláu ljósi. Mjög sérstakt... eins og allt þarna inni.... Seinna um kvöldið fórum við systkinin svo að sjá Ice Age 2 í frááábæru bíói. Ódýrara en á Íslandi og í DK, mergjað stór salur og skjár og mega góð sæti.

Arg, vont að sitja hérna... :/

Uhm.. jáh.. svo í dag var pabbi aftur að vinna en við hin fórum niðrí bæ að skoða og búðar-rápa. Um kl. 5 sótti pabbi okkur og við fórum að versla inn hluti sem bráðvantaði hérna eins og t.d. handklæði og sæng. Þar sem við fundum ekki sæng í búðinni sem við fórum í hér ákváðum við bara að skreppa yfir til Belgíu til að fara í IKEA. Tekur enga stund að keyra þangað. Stefnum á að kíkja líka til Þýskalands og Frakklands í vikunni... allt á nýja fína bílnum hennar mömmu :D

En en jáh.. ég bara geeet ekki setið hér mikið lengur... fæturnir mínir eru ekki sáttir...
Samt eitt.. ég er komin með Lúxemborgískt (errr... eða hvað maður segir) gsm-númer. Ég er því núna með gsm númer í 3 löndum... hversu leet er það? hehe :)

Ætla að skrifa seinna um Lúxemborg, tungumálið, snobbið og so on... en núna er ég að pæla í að joina fjölskyldunni fyrir framan sjónvarpið eða e-ð...

Au revoir!

Sex on the beach

Beint fyrir utan gluggann minn er tré. Á föstudaginn tók ég eftir því að í þessu tré er hreiður. Það er í svona 4-5 metra fjarlægð frá umtöluðum glugga. Finnst yndislegt að hafa það þarna, sýnir að vorið er að koma :) Stend oft út við gluggann og fylgist með fuglinum, ótrúleg þolinmæði í þessum dýrum að liggja á eggjunum svona lengi. (Þetta er bara næstum eins og að hafa gæludýr!).

Helgin er búin að vera áhugaverð með meiru (í þetta sinn tel ég mánudaginn með helginni) :) Föstudagurinn var bara rólegur, vinur minn kom hérna seinnipartinn og var til miðnættis. Það var voða kósí; horfðum á bíómyndir og teiknimyndir, átum kebab og nammi og spjölluðum um daginn og veginn. Laugardagurinn var líka voða rólegur en mér til undrunar hringdi Hrafnhildur frænka í mig og sagði mér að hún væri stödd í Köben (ástæðan flugfreyjunámskeið á mánudeginum). Við ætluðum kannski að hittast til að borða saman en ákváðum svo að hittast frekar snemma á sunnudeginum til að fara saman að versla. Plönin breyttust svo aftur eftir miðnætti þegar hún ákvað bara að kíkja hingað og sátum við og spjölluðum e-ð fram á nótt.

*Varúð: Næstu línur fjalla um verslunarleiðangur, þeim sem halda að þeir muni deyja úr leiðindum við lestur slíks texta er bent á að "hoppa" niður að næstu greinaskilum.* Vöknuðum seint á sunnudagsmorgninum og fórum beint niður í bæ. Komumst að því að það var kalt á Strikinu (gluggaveður!) og flestar búðir lokaðar þannig að við skelltum okkur bara í Fisketorvet. Vorum þarna frá hádegi og til ca. 17 (held ég). Ég keypti mér tvær peysur, jakka, gallabuxur og e-ð fleira og svo gaf Hrafnhildur mér aðrar gallabuxur í afmælisgjöf :) Venjulega haaaaata ég að versla buxur, það er ekkert smá mikið vesen fyrir mig að finna buxur sem passa :/ Við vorum hins vegar svo heppnar að lenda í Only-búðinni og komst ég að því mér til mikillar hamingju að þar er ekkert mál fyrir mig að finna buxur sem passa, jeij.

Héldum niðrá hótel (þar sem Hrafnhildur og allir af námskeiðinu dvöldu) og vorum svo uppgefnar að við enduðum á að leggja okkur í 2 tíma :P Fórum svo út og fengum okkur að borða á Jensen's Bøfhus. Eftir það skunduðum við í bíó á Pink Panther (hræðileg mynd) og enduðum á að fara á Café Norden um kl. 23 og fá okkur swiss mocca og gulrótaköku. Mmmmmm :D Það var samt frekar skondið fyrir þær sakir að þegar við komum inn var aðeins setið á tveimur öðrum borðum og eftir smá stund vorum við einu gestirnir þarna inni :) Venjulega er þessi staður svo troðinn að ekki er hægt að fá borð...

Anyways.. ég ákvað að gista á hótelinu þar sem að Hrafnhildur var hvort sem er ein í tveggja manna herbergi. E-ð varð okkur blaðurskjóðunum lítið um svefn og ég sver að mér hefur aldrei liðið jafn mikið eins og zombie og þegar við þurfum að fara á fætur kl. 6:30 og ég hafði aðeins sofið í ca. klst. Hrafnhildur og allar hinar "freyjurnar" héldu á öryggisnámskeið upp á flugvelli beint eftir morgunmatinn en ég hélt heim (AÐ SOFA!)

Mánudagskvöldið/aðfaranótt þriðjudags... ég ætlaði að lýsa því.. en ég held þið mynduð ekki trúa mér hvort sem er. Set þetta hérna bara í stuttu máli: Hótel - aperitif. Besti ítalski veitingarstaðurinn í Kaupmannahöfn með ca. 10 rosa skemmtilegum flugfreyjunemum, æðislegum mat, daðrandi þjónum og fullt af víni. Kokteilbar/klúbbur með ca. 15 "freyjum" - dj, kokteilar, dansað þar til klúbburinn lokaði. Hótel - partý. Svefn á hóteli kl. 4:30. "Djamm" (váh, ég hef alltaf hatað þetta orð en finn bara ekkert betra) á mánudagskvöldi = málið ;) Komst að því að e-ð af partýgenunum frá mömmu og pabba hafa ratað í mig þrátt fyrir allt... þau eru bara voða oft í feluleik (þau og alvarleikinn/raunsæið eru ekki vinir) :P Kom heim á hádegi í dag.. bara búin að taka því rólega, ryksuga og svona... jeij.

Hvað ætlaði ég að segja ykkur fleira? Hmm jáh, ég er að fara á útitónleika með Sigur Rós í Lúxemborg í júlí! *hlakk* Er ekkert búin að plana sumarið en er bara að láta það ráðast af því hvenær tónleikar og aðrir viðburðir eru í hvaða landi hvar ég verð. Veit ég verð í DK í byrjun júní því þá fer ég með dönskum vini mínum að "heyra" Carmina Burana í tónleikasalnum í Tívolí. Svo greinilega í Lúx í byrjun Júlí og svo líklega brúðkaup hjá Boggu frænku á Norður-Jótlandi um miðjan júlí.

Jahm og já, tíminn líður svo hratt! Finnst þetta ár bara hafa flogið áfram so far. Það er kominn 4. apríl!!! :o Á morgun eiga þá bæði Gúndi og Kristrún afmæli, allir sem þau þekkja að muna að óska þeim til hamingju :) (Svo er 5.apríl náttla líka dánardagur Kurt Cobain's og Layne Staley's). Síðan er ég að verða gömul eftir 10 daga :S Omgs! :) Tæp vika í brottför til Lúxemborgar þannig ég er ekki viss um frá hvaða landi ég blogga næst dk, lu eða is.

Plata vikunnar er pottþétt: Daft Punk - Discovery

Yfir og út!